රටවල් තුනක සිට ලංකාවට ඇතුල්වීම අද සිට තහනම් කරයි

දකුණු කොරියාව, ඉතාලිය සහ ඉරානයේ සිට පැමිණෙන සියලු මගීන් දින 14 ක කාලයක් සඳහා රටට ඇතුලත් කර නොගැනීමට රජය තීරණය කර තිබෙනවා. කොරෝනා වෛරසයේ ව්‍යාප්තිය පාලනය කිරිම සඳහා මෙම පියවර ගත් බවයි සිවිල් ගුවන් සේවා අධිකාරියේ සභාපති උපුල් ධර්මදාස සඳහන් කර සිටියේ. දකුණු කොරියාවේ සිට මෙරටට පැමිණීමට නියමිත අවසන් ගුවන් යානය හෙට දිනයේදී ශ්‍රී ලංකාවට පැමිණීමට නියමිතව තිබෙනවා.
කෙසේ වුවත් මෙම තහනම අද සිට ක්‍රියාත්මක බවයි සිවිල් ගුවන් සේවා අධිකාරියේ සභාපතිවරයා කියා සිටියේ

අපි කියන විදිහට ඉන්න බැරිනම් ආපු රටවලටම යන්න
ඉරානය , ඉතාලිය සහ දකුණු කොරියාව යන රටවලින් පැමිණි ශ්‍රී ලාංකික ගුවන් මගීන්  622 ක් නීරෝධායන කටයුතු සදහා පොළොන්නරුව කන්දකාඩු සහ මඩකලපුව පෞද්ගලික විශ්ව විද්‍යාලය වෙත යොමු කර ඇති බව සීමාසහිත ගුවන් තොටුපළ සහ ගුවන් සේවා සමාගමේ අධ්‍යක්ෂ ෂෙහාන් සුමනසේකර මහතා පැවසීය. ඔවුන් එම ස්ථාන වෙත රැගෙන යෑම සදහා සෞඛ්‍ය අමාත්‍යාංශය සහ ශ්‍රී ලංකා යුධ හමුදාව විසින් සුඛෝපභෝගී බස් රථ 25 ක් සහ ඔවුන්ගේ ගමන් මලු ප්‍රවාහනයට තවත් වෑන් රථ 05 ක් පමණ ද යොදාගෙන තිබුණි . කෙසේ වෙතත් අද රාත්‍රී 8.00 පමණ වනවිටත් මෙම රටවලින් පැමිණි ගුවන් මගීන් 50 ක පමණ පිරිසක් , තමන් මෙම නීරෝධායන ක්‍රියාවලියට යොමු නොකර ගන්නා ලෙසත් , තමන්ට කඩිනමින් තම නිවෙස් කරා යෑමට අවසර ලබා දෙන ලෙසත් ඉල්ලීම් කරමින් , ගුවන් තොටුපළ පර්යන්ත ගොඩනැගිලිල්ල තුළ විරෝධතා පවත්වමින් සිටින බවද ගුවන් තොටුපළ අධ්‍යක්ෂ ෂෙහාන් මහතා පැවසීය. මේ අතර හමුදා මාධ්‍ය ප්‍රකාශක  බ්‍රිගේඩියර්  චන්දන වික්‍රමසිංහ මහතා අද  (11) පවසා සිටියේ කොරෝනා වෛරසයෙන්  මහජනයා  ආරක්ෂා කර ගැනීමට  ශ්‍රී ලංකිකයන් වශයෙන්  සියලුම දෙනා රජයට සහය ලබා දිය යුතු බවත් රටතුළ  සිදුකරන  නිරෝධායන  කටයුතු සඳහා සහය ලබා නොදෙන පිරිසට නැවතත් ඔවුන් පැමිණි රටවලට ආපසු යා හැකි බවත්ය. කොල්ලුපිටිය ආරක්ෂක අමාත්‍යාංශ මාධ්‍ය මධ්‍යස්ථානයේ අද (11)  පැවති  විශේෂ මාධ්‍ය හමුවකදී හමුදා ප්‍රකාශකවරයා එසේ පැවසීය.

රටේ මිලියන 21 ක් වූ ජනතාව ආරක්ෂා කිරීමේ වගකීම හා ජාතික ආරක්ෂාවේ වගකීම ත්‍රිවිධ හමුදාව වෙත පැවරී ඇති බවත් මෙවැනි අවස්ථාවක රජයේ   නිරෝධායන  ක්‍රියාවලියට සහය  නොදක්වන පිරිසට  එරෙහිව කටයුතු කිරීමට  නීතිමය ප්‍රතිපාදනය ඇති බවත් හමුදා මාධ්‍ය ප්‍රකාශකවරයා කියා සිටියේය. ඉරානය , ඉතාලිය සහ දකුණු කොරියාව යන රටවලින් ශ්‍රී ලංකාවට පැමිණෙන ගුවන් මගීන් , මෙම රෝගය රට තුළ ව්‍යාප්ත වීම වැලැක්වීම සදහා අනිවාර්යයෙන් දින 14 ක කාළයක් නීරෝධායන ක්‍රියාවලියකට ලක් කළ යුතු බවට රජය විසින් සෞඛ්‍ය අමාත්‍යාංශය හරහා චක්‍ර ලේඛයක් නිකුත් කර තිබේ.  මේ පිළිබඳව අදාළ ආයතන සහ විශේෂයෙන් කටුනායක ගුවන් තොටුපළ දැනුවත් කර ඇති බව ගුවන් තොටුපළ අධ්‍යක්ෂ ෂෙහාන් සුමනසේකර මහතා පැවසීය .කෙසේ වෙතත් මේ පිළිබඳව මෙම ගුවන් මගීන් කටුනායක ගුවන් තොටුපළ වෙත පැමිණෙන තෙක්ම , මෙම නීරෝධායන ක්‍රියාවලිය පිළිබඳව දැනුවත් වී නොතිබීම නිසා , මෙවැනි ගැටුම්කාරී තත්වයක් කටුනායක ගුවන් තොටුපළ තුළ නිර්මාණය වී ඇති බව ද ෂෙහාන් සුමනසේකර මහතා වැඩිදුරටත් පැවසීය.

දැනට භාවිතා කෙරෙන ක්‍රියාවලිය මගින් ගුවන් මගීන් මෙම රෝගය ආසාදනය වී ඇත් ද යන්න අනාවරණය වන අතර , ඔවුන්ගේ දරු පවුල් සහ සමස්ථ රටේ ජනතාව ද මෙම කොරෝනා වසංගතයෙන් ආරක්ෂා වන බවද සුමනසේකර මහතා  වැඩිදුරටත් පැවසීය .විදේශීය ශ්‍රමිකයන් මෙරටට  පැමිණෙන්නේ නම් ශ්‍රී ලංකාවේ නීතියට අනුව කටයුතු කළ යුතු බවත් මෙම පිරිස  බලා ගැනීමේ  වගකීම  තමන්ට ඇති බවත් පැවසූ හමුදා මාධ්‍ය ප්‍රකාශකවරයා  ඔවුන් අතරින් කිසිවකුට හෝ කොරෝනා වෛරසය ශරීරගත වී තිබුණ හොත් එය රට තුළට ව්‍යාප්ත වීම වළක්වා  ගැනීමට  අවශ්‍ය නිසා  එම සියලු දෙනා දින 14 ක  නිරෝධයනයට  යොමු කිරීමකළ යුතු  බවත්  සඳහන් කළේය. මඩකලපුව පුනානි හා කන්දකාඩු  නිරෝධායන මධ්‍යස්ථාන වලට යොමුකර සිටින පිරිසට රජය ලබාදියහැකි  උපරිම පහසුකම් ලබා දී ඇති බවත් හමුදා ප්‍රකාශවරයා  සඳහන් කළේය. ශ්‍රි ලංකාවට පැමිණ මෙම පිරිස පුනානි හා කන්දකාඩු    මධ්‍යස්ථාන හැර වෙනත් කිසිඳු මධ්‍යස්ථානයක රඳවා නොමැති බවද ප්‍රකාශකවරයා පැවසීය

ජපුර සරසවි නවක වධයේ තවත් තිරිසන් කතාවක් - අරක්කු බොන ගමන් ජ්‍යෙෂ්ඨයෝ කනිෂ්ඨයාගේ හිසට ටයරයක් අත ඇරලා - සිසුවා ජීවිතයත් මරණයත් අතර සටනක

ශ්‍රී ජයවර්ධනපුර විශ්වවිද්‍යාලයේ ශිෂ්‍යයෙක් විශ්වවිද්‍යාලයීය ක්‍රීඩාගාරයේ ඉහළ සිට තරප්පු පෙළ දිගේ එවූ ටයරයක් වැදීමෙන් පහළ ක්‍රීඩාගාරයේ සිටි සිසුවකු තුවාල ලබා පසුගිය 06 වැනිදා කොළඹ ජාතික රෝහලට ඇතුළත් කර ඇති අතර ඔහුගේ තත්ත්වය බරපතළ බව රෝහල් ආරංචි මාර්ග පවසයි. මෙසේ අනතුරට ලක්ව ඇත්තේ නව අධ්‍යයන වසර සඳහා කළමනාකරණ පීඨයට ඇතුළත් වූ මිනුවන්ගොඩ පදිංචි පසිඳු හිරුෂාන් නමැති සිසුවෙකි. මෙම අනතුර සිදු වී ඇත්තේ එදින අලුයම 1.30ට පමණ ය. කළමනාකරණ පීඨයේ පළමු වසර සිසුසිසුවියන් පිළිගැනීමේ තෙමසක කාලසීමාව අවසන් වීමේ සාදය ඉකුත් 5 වැනිදා පවත්වා ඇති අතර සාදයෙන් පසු තවදුරටත් සිසුන් පිරිසක් එහි රැඳී සිට තිබේ.

ඒ අතරින් සිසුන් කිහිප දෙනෙක් ඉහළ ක්‍රීඩාගාරයේ සිටින්නට ඇතැයි පරිපාලන අංශ සැකකරයි. සාදය සංවිධානය කර ඇත්තේ එම පීඨයේ දෙවැනි වසර සිසුන් ය. ක්‍රීඩාගාරයේ ඉහළ සිට ආ ටයරය වැදීමත් සමගම ශිෂ්‍යයා බිම ඇද වැටී තිබේ. බිම වැටීමෙන් හිසට බරපතළ හානි සිදු වී ඇතැයි රෝහල් ආරංචි මාර්ග පවසයි. එම අවස්ථාවේ සිසුන් හා ආරක්ෂක අංශ එක්ව සිසුවා වහාම කළුබෝවිල රෝහලට ඇතුළත් කිරීමට පියවර ගෙන ඇති අතර එම රෝහලින් කොළඹ ජාතික රෝහලට මාරු කර තිබේ.කෙසේ වෙතත් සිසුවාගේ තත්වය ඉතා බරපතළ තත්වයක පවතින බවට වෛද්‍යවරුන් පවසන අතර ජීවිතය පවා සැකසහිත බව වෛද්‍යවරුන්ගේ මතය වී තිබේ. අනතුර සම්බන්ධයෙන් විනයාධිකාරිගේ ප්‍රධානත්වයෙන් මූලික පරීක්ෂණයක් පැවැත්වෙන අතර එම පරීක්ෂණ වාර්තාව අනුව ඉදිරි ක්‍රියාමාර්ග ගන්නා බව උපකුලපති මහාචාර්ය සුදන්ත ලියනගේ පැවසීය. තරප්පු පෙළ දිගේ ටයරය එවා ඇත්තේ කවුරුන් ද යන්න අනාවරණය වී නැතැයි ද මහාචාර්යවරයා කීවේය.

කෙසේ වෙතත් මෙම ක්‍රියාව සිදුකළ අදාළ ජ්‍යේෂ්ඨ සිසුන් , මෙය ටයරක් අතෑරීමෙන් සිදුවූ අනතුරක් නොව යතුරුපැදි අනතුරක් නිසා සිදූවක් බවට කියමින් සිද්ධිය යටපත් කිරීමේ උත්සහයක නිරත වන බවද වාර්තාවේ.

කිලිනොච්චි දෙමළ ජනයාගේ ආදරයට පත් කර්නල් රත්නප්‍රිය බන්දු පොහොට්ටුවෙන් මැතිවරණයට..!
පසුගිය කාලයේ මාධ්‍ය මගින් කතාබහට ලක් කළ කිලිනොච්චිය වට්ටකච්චි සිවිල් ආරක්ෂක දෙපාර්තමේන්තුවේ ප්‍රධානියා වශයෙන් කටයුතු කළ කර්නල් රත්නප්‍රිය බන්ධු මහතා මෙවර පොදුජන පෙරමුණ නියෝජනය කරමින් වන්නි දිස්ත්‍රික්කයෙන් මැතිවරණයට ඉදිරිපත් වනවා. ඔහු වට්ටකච්චි සිවිල් ආරක්ෂක මූලස්ථානයෙන් ස්ථාන මාරුවීම් ලැබ නික්ම යන මොහොතේදී දෙමළ ජනතාව විශාල පිරිසක් ඔහුව මාරු නොකරන ලෙස ඉල්ලා උද්ඝෝෂණයක් පැවැත්වූ අතර බොහෝ පිරිස් කිලිනොච්චියෙන් ඔහුට සමුදෙන ලද්දේ හැඬු­ කඳුළෙනි. 
රත්නප්‍රිය බන්ධු මහතා වන්නි දිස්ත්‍රික්කයෙන් මැතිවරණයට තරග කරන බව කීවේ අමාත්‍ය විමල් වීරවංශ මහතාගේ ප්‍රධානත්වයෙන් වැලිඔය ප්‍රදේශයේ පැවැති සාකච්ඡාවකදීයි.

මත්කුඩු භාවිතයට (හෙරොයින්) අවශ්‍ය මුදල් සොයා ගැනීම සඳහා18 හැවිරිදි තම පෙම්වතිය වරින් වර සළෙළුන්ට මුදලට විකුණූ බව කියන පෙම්වතකුට එරෙහිව නීතිපතිවරයා විසින් මීගමුව මහාධිකරණ විනිසුරු අමල් රණරාජ මහතා හමුවේ නඩු පවරා අධිචෝදනා පත්‍රය භාර දී තිබෙනවා. තම පෙම්වතිය මුදලට විකිණීමේ චෝදනා ලැබූ විත්තිකරු වූයේ (පෙම්වතා) කටාන නැගෙනහිර කළුවාරිප්පුව දිසාගෙවත්ත පදිංචි 40 හැවිරිදි අයෙක්‌ වන අතර 2016 ජූලි මස සිට 2016 ඔක්‌තෝබර් මස දක්‌වා අතර කාලය තුළ තම පෙම්වතිය මුදලට විකිණීමට සම්බන්ධයෙන් ඔහු අධිචෝදනා ලබා තිබෙනවා.

නඩුව කැඳවූ අවස්‌ථාවේ පැමිණිල්ලෙන් හෙළිදරව් වූ කරුණු අනුව මෙහි විත්තිකරු මත්ලෝලී 40 හැවිරිදි විවාහක පුද්ගලයාට අහම්බෙන් 18 හැවිරිදි තරුණියක්‌ හමුවී ඇති අතර පසුව ඇය විත්තිකරු විසින් තම පෙම්වතිය බවට පත්කර ගෙන ඇති බවයි සඳහන් වන්නේ. එම තරුණිය මෙම විත්තිකරු තදින් මත්ලෝලියකු බවත් විවාහකයකු බවත් නොදැන සිට ඇති අතර තදින් කුඩු මතට ඇබ්බැහි වූ විත්තිකරු පසුව තම පෙම්වතිය ඇගේ නිවසින් පැහැර ගෙන ගොස්‌ ඔහු ළඟ තබාගෙන සිට තිබෙනවා. පසුව විත්තිකරුට මත්කුඩු පානය සඳහා මුදල් අවශ්‍ය වූ විට විත්තිකරු සළෙළුන්ට තම පෙම්වතිය රුපියල් 3000 බැගින් අයකොට ඔවුනට පෙම්වතිය ලබාදී තිබෙනවා.එම ක්‍රියාවලියට ඇය අකමැති වූ විට ඇයට දරුණු ලෙස පහරදීම විත්තිකරු පුරුද්දක්‌ කොටගෙන සිට ඇති අතර එම තාඩන පීඩන ඉවසිය නොහැකිවූ ඇ‍ය කටාන පොලිසියේ ළමා හා කාන්තා කාර්යාංශය වෙත  ඒ සම්බන්ධයෙන්  ඉදිරිපත් කළ පැමිණිල්ලකට අනුව ඔහු  අධිචෝදනා ලබා තිබෙනවා

මධ්‍යම, වයඹ සහ සබරගමුව පළාත්වලත්, අනුරාධපුර, වව්නියාව, මන්නාරම සහ මුලතිව් දිස්ති‍්‍රක්කවලත් අද පස්වරු 02 න් පමණ පසු තැනින් තැන ගිගිරුම් සහිත වැසි ඇතිවිය හැකි බව කාලගුණ විද්‍යා දෙපාර්තමේන්තුව පවසනවා.
ගිගිරුම් සහිත වැසි සමග ඇතිවිය හැකි තාවකාලික තද සුළං සහ අකුණු මගින් සිදුවන අනතුරු අවම කර ගැනීමට අවශ්‍ය පියවර ගන්නා ලෙසයි එම දෙපාර්තමේන්තුව ජනතාවගෙන් ඉල්ලා සිටින්නේ.
මඩකලපුව සිට තී‍්‍රකුණාමලය, කන්කසන්තුරය සහ මන්නාරම හරහා පුත්තලම දක්වා වන මුහුදු ප‍්‍රදේශවල ද තැනින් තැන සවස් කාලයේ හෝ රාතී‍්‍ර කාලයේ වැසි හෝ ගිගිරුම් සහිත වැසි ඇතිවිය හැකි බවයි කාලගුණ විද්‍යා දෙපාර්තමේන්තුව සඳහන් කළේ

පෙරේදා( 2) දින සවස කරුවලගස්වැව කුඩාමැදවච්චිය ප්‍රදේශයේ ගොවිපළකින්  චීන ජාතිකයකු අභිරහස් ලෙස මියගොස් සිටියදී හමුවී තිබෙන අතර එම මරණය හා මේ දිනවල පැතිර යන කොරෝනා වෛරස් තත්වය අතර සම්බන්ධයක් තිබේද යන්න ගැන සැකසංකා මතුව තිබේ. මොහු චීන ජාතිකයෙකු වුවත් දිගු කලෙක සිටම ලංකාවේ පදිංචිව සිටි අයෙකු වන අතර කුඩාමැදවච්චිය අක්කර 100 ප්‍රදේශයේ වන අලි ගැවසෙන කැලයක් මැද ගොවිපළක් පවත්වා ගෙන ගිය අයෙකි. ඔහුට ශ්‍රී ලංකාවේ පුරවැසිභාවය හිමිව තිබූ බවද පැවසේ. ලී ජයාන්  නමැති ඔහු වයස අවු: 65 ක පමණ අයෙකු බව පැවසිණි. ඔහු ලංකාවේ පුද්ගලයින් යොදවා මෙම ගොවිපළ කරගෙන ගියත් මෙරට අය සමග වැඩි සම්බන්ධයක් තබාගැනීමට අකමැත්තෙන් පසුවූ අයෙකු බව පරීක්ෂණ වලදී හෙළිව තිබේ. ගොවිපොළේ කිසිදු සේවකයකු මෙම චීන ජාතිකයා නැවතී සිටින නිවහනට පැමිණීමගැන ඔහු අකමැති වූ බවත් කියැවේ. ඔහු තනිවම සියලු වැඩ කරන අයෙකු බව කියන ඔහු ආහාර පිළියෙල කිරීම ඇතුළු ගේදොර වැඩද තනිවම කරගෙන ගිය බව කියැවිණි.

සතියකට පමණ පෙර මෙම ගොවිපොළේ කළමණාකරු ලෙස කටයුතු කළ ශ්‍රී ලාංකිකයා අසනීප තත්වයක් හේතුවෙන් රෝහල් ගත කර තිබී ඇති අතර චීන ජාතික අයිතිකරු කළමනාකරුගේ වැඩද සිදු කරමින් සිට ඇත. කෙසේ වෙතත් ඔහුද ටික දිනකින් පෙනෙන්නට නොමැති නිසා ගොවිපළේ මුරකරු ඒ ගැන පරීක්ෂාකාරී වී ඇත. චීන ජාතිකයා සිටි නිවස අසළට ගොස් ජනේලයකින් බලන විට ඔහු අභිරහස් ලෙස මරණයට පත්ව සිටි බව ගොවිපළේ මුරකරු කරුවලගස්වැව පොලිසියට පැමිණිලි කර තිබිණි.චීන ජාතිකයා පුටුවක් මත වැටී සිටින අයුරු දක්නට ලැබුණු බව මුරකරු  පොලීසියට පවසා ඇත. සිරුර පිළිබඳව පුත්තලම අධිකරණ වෛද්‍යවරයා ලවා පශ්චාත් මරණ පරීක්ෂණයක් කර, පුත්තලම අධිකරණයට වාර්තාවක් ඉදිරිපත් කරන ලෙස  පුත්තලම වැඩ බලන මහේස්ත්‍රාත්  මොහොමඩ් රාපි මහතා කරුවලගස්වැව පොලීසියට නියෝග කළේය.
එම පැමිණිල්ලට අනුව පොලිස් පරීක්ෂණ  ආරම්භ වූ අතර, සිද්ධිය සම්බන්ධව කරුවලගස්වැව පොලීසිය පුත්තලම අධිකරණයට කරුණු දැක්වීය. මෙම ස්ථානය නිරීක්ෂණය කළ වැඩබලන මහේස්ත්‍රාත්වරයා මෙම නියෝගය නිකුත් කළේය. චීන ජාතිකයා මිය ගොස් සිටි ස්ථානයේ කුඩා කුප්පි දෙකක් තිබූ බවත්, එහි ඇත්තේ ඖෂධයක්ද, එසේත් නැත්නම් වෙනත් දෙයක්ද යන්න මෙතෙක් අනාවරණය වී නැති බවත් පොලීසිය කියයි.

මෙම චීන ජාතිකයා  1992 මෙරටට පැමිණි ඇති අතර,   මොහු චීන ජාතිකයෙකු වීම නිසා මෙම මරණය කොරෝනා මරණයක්ද යන්න ගැන සැකයක් මතුව ඇතත් තවම එවැනි සාක්ෂි නිසි ලෙස රැස්කරගන්නට ලැබී නැත. කෙසේ වෙතත් කොරෝනා මුල විෂබීජ පැතිරගිය බවට සැකකළ හැකි  2019 අගෝස්තු - සැප්තැම්බර් කාලයේදී පමණ  චීනයට ගොස් මොහු නැවත පැමිණ ඇත. ඔහු 2015 වර්ෂයේ ශ්‍රී ලංකික පුරවැසිභාවය ලබා ඇති අතර කලක් චීන යුද හමුදාවේ සේවය කර ඇති බවද අනාවරණය වී ඇත. පුත්තලම මූලික රෝහලේ සහකාර අධිකරණ වෛද්‍ය නිලධාරී කුලේන්ද්‍ර කාන්ත් මහතා හා පුත්තලම හදිසි මරණ පරීක්ෂක නන්දන විමරවීර මහතා එම සිරුර  සහ ස්ථානය පරීක්ෂා කළහ. කරුවලගස්වැව පොලිස් කණ්ඩායමක් පරීක්ෂණ පවත්වති

කොරෝනා වෛරසය රට තුළට ඇතුළු වීම වළක්වා ගැනීමේ පියවරක් ලෙස ලෙස දකුණු කොරියාව, ඉතාලිය සහ ඉරානය යන රටවලින් පැමිණෙන සියලූ ගුවන් මඟීන් සහ නෞකාවලින් පැමිණෙන මඟීන් දින 14ක නිරෝධායන ක‍්‍රියාවලියකට ලක් කිරීමට සෞඛ්‍ය අමාත්‍යංශය තීරණය කර තිබෙනවා. 
එම අමාත්‍යාංශයේ අද පැවැති මාධ්‍ය හමුවකදී සෞඛ්‍ය අමාත්‍ය පවිත‍්‍රා වන්නි ආරච්චි මේ බව කියා සිටියා. එමෙන්ම නාවික මාර්ග හරහා සුඛෝපභෝගී මඟී නෞකාවලින් පැමිණෙන මඟීන් රටතුළට ඇතුළු කර ගැනීම වහාම කි‍්‍රයාත්මක වන පරිදි අත්හිටුවා ඇති බවයි සෞඛ්‍ය සේවා අධ්‍යක්‍ෂ ජනරාල් විශේෂඥ වෛද්‍ය අනිල් ජාසිංහ මෙම මාධ්‍ය හමුවේදී කියා සිටියේ.

දකුණු කොරියාවේ සිට පැමිණෙන ලාංකිකයින් සංඛ්‍යාව ඉහළ යයි
දකුණු කොරියාවේ මේ වනවිට මෙම කොරෝනා වසංගත රෝගය වඩාත් වේගයෙන් පැතිර යමින් පවතින බව එරටින් ලැබෙන තොරතුරු මගින් අනාවරණය වනවා. ඒ අනුව අද (01) දින අලුයම 3.56 දකුණු කොරියාවේ ඉන්චියොන් සිට පැමිණි කොරියානු ගුවන් සේවයට අයත් කේ.ඊ.- 473 දරන ගුවන් යානයෙන් ගුවන් මගීන් 182 ක් කටුනායක ගුවන් තොටුපළ වෙත පැමිණ තිබුණා. මෙම පිරිස අතරින් 137 දෙනෙකුම ශ්‍රී ලාංකිකයන් වීම විශේෂත්වයක්. මේ ආකාරයට පසුගිය දින කිහිපය තුළ දී දකුණු කොරියාවේ සිට පෙර පැවති තත්වයට වඩා ශ්‍රී ලංකාවට පැමිණෙන ගුවන් මගීන්ගේ සංඛ්‍යාවේ වර්ධනයක් දක්නට ලැබෙන බව කටුනායක ගුවන් තොටුපළ කාර්යය භාර නිලධාරීවරයා වැඩිදුරටත් පවසා තිබෙනවා.

එමෙන්ම මෙම ගුවන් යානයෙන් පැමිණි ශරීර උෂ්ණත්වයේ යම් වෙනස්වීමක් නිරීක්ෂණය වූ  සහ උණ රෝගයෙන් පෙළුණු ගුවන් මගීන් දෙදෙනෙකු  කටුනායක ගුවන් තොටුපළ සෞඛ්‍ය වෛද්‍ය ඒකකය මගින් හඳුනාගෙන තිබෙනවා. ඔවුන් විශේෂ ගිලන් රථ මගින් මීගමුව දිස්ත්‍රික් මහ රෝහල වෙත ඇතුළත් කර ඇති බවයි වාර්තා වුණේ. කටුනායක ගුවන් තොටුපළ වෙත විවිධ රටවල සිට පැමිණෙන සියලුම ගුවන් මගීන් ගුවන් තොටුපළ සෞඛ්‍ය වෛද්‍ය ඒකකයේ ස්ථාපිත කර ඇති ස්වයංක්‍රීය උපකරණ මගින් නිරන්තර පරීක්ෂාවට ලක් කෙරෙනවා.

මව්පියන්ට එපා වූ දරුවන් විසිකර දැමීම වැළැක්වීම සඳහා සෑම රෝහලකම වෙනම කාමරයක් ස්ථාපිත කරන ලෙසට ජාතික ළමා ආරක්ෂක අධිකාරිය ආණ්ඩුවට යෝජනා කර තිබේ. එවැනි දරුවන් විසිකර දැමීමේ ප්‍රවණතාවක් දක්නට ලැබෙන බව අධිකාරිය පෙන්වා දෙයි. රෝහල්වල ඉදිකෙරෙන කාමරයට දරුවා භාර දීමේදී මවගේ තොරතුරු ලබා ගැනීමක්ද සිදු නොකරන ලෙසට යෝජනා කර ඇත.
ජාතික ළමා ආරක්ෂක අධිකාරිය මෙම යෝජනාව ලබා දී ඇත්තේ ළමා සහ කාන්තා කටයුතු අමාත්‍ය පවිත්‍රා වන්නිආරච්චිටය. මේ සඳහා නීති ප්‍රතිපාදන සකස් කළ යුතු බවද පෙන්වා දී තිබේ. තවද පාසල්වල සිදුවන විවිධ අපයෝජන පිළිබඳ තොරතුරු ලබා ගැනීම සඳහා ‘‘පාසලෙන් – නීතියට’’ යන සංකල්පය යටතේ ලියුම් පෙට්ටියක් සෑම පාසලකම තැබීමටද ජාතික ළමා ආරක්ෂක අධිකාරිය තීරණය කර ඇත.

එහිදී පාසල් දරුවන් මුහුණ දෙන විවිධ අපයෝජන පිළිබඳ සටහනක් ලියුම් පෙට්ටියට බහාලීමට හැකිය. සතියකට වරක් එම ලිපි ලබාගෙන අවශ්‍ය නීතිමය පියවර ගැනීම අධිකාරියේ බලාපොරොත්තුවයි

මේ දිනවල පවතින අධික උණුසුමත් සමඟ ජනතාව දැඩි පානීය ජල ප්‍රශ්නයකට මුහුණපා සිටිති. දැඩි නියඟය නිසා බොහෝ ජලවිදුලි බලාගාරවල ජල ප්‍රමාණය අඩුවීමෙන් විදුලිය උත්පාදන ගැටලු ද උද්ගතව තිබේ. 
ජාතික ආපද‌ා කළමනාකරණ මධ්‍යස්ථානය පවසන්නේ පළාත් හතරකට අයත් දිස්ත්‍රික්ක හයකට මෙම තත්ත්වය බලපා ඇති බවයි. එම තොරතුරු අනුව පවුල් පනස්හතර දහස් තුන්සිය තිස් හයක පුද්ගලයෝ දෙලක්ෂ විසිඅට දහස් පන්සියයක් පීඩාවට පත්ව සිටිති. මෙම අධික වියළි කාලගුණ තත්ත්වය නිසා සිදුව ඇති හානිය පිළිබඳ ආපද‌ා කළමනාකරණ මධ්‍යස්ථානයෙන් විමසීමක් කළෙමු. එහි මාධ්‍ය හා මහජන සම්බන්ධතා පිළිබඳ සහකාර අධ්‍යක්ෂ ජානක හඳුන්පතිරාජ මහතා අපට පැවසුවේ පීඩාවට පත් ජනතාවට සහන සැලසීමට කඩිනමින් කටයුතු කරන බවයි. විශේෂයෙන් පානීය ජල ප්‍රශ්නය දැඩිව පවතින ප්‍රදේශ වෙත බවුසර මගින් ජලය බෙද‌ාහැරීමට කටයුතු කරන බව ඔහු අවධාරණය කළේය.
මේ ඔහු දැක්වූ අදහස්ය.
කෑගල්ල, රත්නපුර, මහනුවර, කළුතර යන දිස්ත්‍රික්කවලට නියඟය තදින් බලපාලා තියෙනවා. කෑගල්ලෙ රුවන්වැල්ල, බුලත්කොහුපිටිය යන ප්‍රාදේශීය ලේකම් කොට්ඨාස දෙකේ ජනතාවට අපි දැනට පානීය ජලය ලබාදෙනවා. එහි පවුල් 281 වගේ පොඩි සංඛ්‍යාවකට තමයි ජලය අත්‍යවශ්‍යව තියෙන්නේ. ඒ වගේම දැරණියගල, ගලිගමුව, වරකාපොළ යන ප්‍රාදේශීය ලේකම් කොට්ඨාසවලටත් නියං තත්ත්වය බලපාලා තියෙනවා. නමුත් ඒ සඳහා පානීය ජලය ලබාදීමට තරම් අවශ්‍යතාවක් නැහැ. රත්නපුර ගත්තම ඇහැලියගොඩ ප්‍රාදේශීය ලේකම් කොට්ඨාසයට නියං තත්ත්වය බලපාලා තියෙනවා. එහි පවුල් 1921 ක පුද්ගලයන් 7959 ක් ගැන සඳහන් වෙනවා. නමුත් ඔවුනට ජලය ලබාදීමේ අවශ්‍යතාවක් නැහැ. ඊට අමතරව මහනුවර දිස්ත්‍රික්කයේ අකුරණ ප්‍රාදේශීය ලේකම් කොට්ඨාසයේ පවුල් 350 ක 1213 දෙනෙක් පීඩාවට පත්වෙලා තියෙනවා. ඔවුන්ටත් ජලය බෙද‌ාදීමේ අවශ්‍යතාවක් නැහැ.

මෙහිදී වැඩිම බලපෑමක් සිදුව තිබෙන්නෙ කළුතර දිස්ත්‍රික්කයට. ඊට හේතුව කළු ගඟේ ජලයට මුහුදු ජලය මිශ්‍රවීමයි.
කළුතර, බේරුවල, පානදුර, දොඩම්ගොඩ යන ප්‍රාදේශීය ලේකම් කොට්ඨාසවලට මෙය බලපාලා තියෙනවා. කළුතර දිස්ත්‍රික්කයේ මිල්ලනිය, මතුගම සහ හොරණ යන ප්‍රාදේශීය කොට්ඨාස තුනටත් මේ නියං තත්ත්වය බලපා තිබෙනවා. මෙසේ විපතට පත් කළුතර ප්‍රාදේශීය ලේකම් කොට්ඨාස හතටම පානීය ජලය ලබාදීම සිදුකරනවා. කළුතර දිස්ත්‍රික්කයේ පමණක් පවුල් පනස්එක් දහස් එකසිය හැත්තෑ පහක පුද්ගලයන් දෙලක්ෂ පනස්දහස් විසිපහක් පීඩාවට පත්වෙලා තියෙනවා. නියංසායෙන් විපතට පත් දිස්ත්‍රික්කවලට අවශ්‍ය ජලය ටිපර්, බවුසර් රථ මගින් ලබාදෙන අතර ඒ අද‌ාළ ස්ථානවල ජල ටැංකි ස්ථානගත කරලා තියෙනවා. ඒ ජල ටැංකිවලට දෛනිකව ජලය සපයනවා. ජාතික ආපද‌ා කළමනාකරණ මධ්‍යස්ථානය, ජාතික ආපද‌ා සහන මධ්‍යස්ථානය, ත්‍රිවිධ හමුද‌ාව, දිස්ත්‍රික් කාර්යාල, පළාත් පාලන ආයතන, ප්‍රාදේශීය සභා සහ නගර සභා ඇතුළු ආයතන මගින් තමයි පහසුකම් ලබාදෙන්නේ. මේ නියඟය එක්ක ආපු අනිසි බලපෑමක් තමයි වනාන්තර ගිනි ගැනීම. එය දෛනිකව වාර්තා වෙනවා. දැඩි අව් රශ්මියත් එක්ක තමයි එවැන්නක් සිදුවෙන්නෙ. මේ වියළි තත්ත්වයත් එක්ක කුමක් හෝ මානව ක්‍රියාකාරකමක් සිදුවෙනවා.
ඒ තත්ත්වය කොළඹ, මහනුවර, කෑගල්ල, කුරුණෑගල, බදුල්ල, මොනරාගල, නුවරඑළිය, ගාල්ල, මාතර, මාතලේ, හම්බන්තොට, අනුරාධපුර වගේ ප්‍රදේශවලත් සිදුවුණා. පසුගියද‌ා කොළඹ රාජගිරිය බුත්ගමුව වගුරුබිම ආශ්‍රිතවත් ගිනි ගැනීමක් වාර්තා වුණා. ගුවන් හමුද‌ාවෙ සහයෝගය ලබාගෙන එම ගින්න නිවා දැමුවා. ඊට අමතරව ගම්පහ ප්‍රදේශයේත් ගින්නක් වාර්තා වුණා. බොහෝ වෙලාවට දුර බැහැර ප්‍රදේශවල වගා කටයුතු කරන්නේ ඉදිරි වර්ෂාව බලාගෙන. විශේෂයෙන් හේන් ගොවිතැන් සඳහා බිම් සකස් කිරීමේදී ඒ අද‌ාළ ප්‍රදේශ ගිනි තියලා යනවා. ඉන්පසුව සුළඟ නිසා ගින්න තවත් පැත්තකට පැතිරෙන්න පුළුවන්. එවැනි පැතිරීම් නිසා විශාල පරිසර හානියක් හා සත්වයන් විනාශවීමක් සිදුවුණා. ඒ වගේම සංචාරකයන් විසින් කෑම පිසීමට සහ ගිනිතැපීමට ගින්දර යොද‌ා ගැනීමෙන් පවා මේ තත්ත්ව උද‌ාවෙන්න පුළුවන්. දඩයක්කාරයන් සතුන් මැරීම සඳහා කැලෑවට ගිනිතැබීම නිසා ඇවිළීයාමෙන් මෙම තත්ත්වය ඇතිවෙන්න පුළුවන්.

අප ආපද‌ා කළමනාකරණ මධ්‍යස්ථානය විදියට කාටත් කියන්න තියෙන්නෙ මෙවැනි තත්ත්වයන් ඇති කරන්න එපා. මොකද අපි පරිසරය එක්ක ජීවත් වෙන්න ඕනැ. පරිසරයට ආදරය කරන්න ඕනැ. මේ තත්ත්ව පාලනය කරගැනීමට නොහැකි වුණොත් හානිය වෙන්නෙ මානව වර්ගයාටම. අපි හැමෝටම. ඒ නිසා අප තුළ ස්වයං පාලනයක් තිබිය යුතුයි. 2009 අංක 65 දරන කැලෑ පනතේ සඳහන් වෙනවා ගින්නක් දල්වනවා නම්, කැලෑවක් මැදින් ගින්දර ගෙනයනව නම් ගින්දර පැතිර යාම බලා සිටිනවා නම් ඒ හැම තත්ත්වයක් තුළම වරදක් ද ඇති බව. යම් තැනැත්තෙකු ඒ සම්බන්ධව වරදකරුවෙකු වුවහොත් ඔහුට වසර 7 කට නොඉක්මවුණු කාලයකට බන්ධනාගාරගතවීමට සිදුවෙනවා. ඊට අමතරව දඩ මුදලක් ද ගෙවීමට සිදුවෙනවා. මේ දඬුවම් දෙකටමත් ලක්විය හැකියි. මේ තත්ත්වයන් පාලනය කිරීමට තමයි අපේ මධ්‍යස්ථානය නිතරම කටයුතු කරන්නෙ. යම් ප්‍රදේශයක ආපද‌ා තත්ත්වයක් වාර්තාවෙනව නම් එය අවම කර ගැනීමට අපට සම්බන්ධිකරණ කටයුතු සිදුකරලා දෙන්න පුළුවන්. ආපද‌ා කළමනාකරණ මධ්‍යස්ථානයට 117 දුරකථන ඇමතුමක් ලබාදෙන්න පුළුවන්.

කාලගුණ විද්‍යා දෙපාර්තමේන්තුව සඳහන් කරන අන්දමට බොහෝ දිස්ත්‍රික්ක ප්‍රමාණයක තියෙන්නෙ ඉතා වියළි කාලගුණික තත්ත්වයක්. වයඹ පළාතේත්, හම්බන්තොට, මොනරාගල යන දිස්ත්‍රික්කවල සුළඟේ වේගය පැයට කිලෝ මීටර් 40 ක් දක්වා වැඩි වී තිබෙනවා. මේ තත්ත්වය තුළ හදිසි ගිනි ගැනීම් තත්ත්ව ඇතිවෙන්න පුළුවන්. සුළඟත් එක්ක මේ දේවල් පැතිරීමේ ප්‍රවණතාවක් තියෙනවා. ඒ නිසා මේ තත්ත්ව අවම කරගැනීමට මහජන සහාය අවශ්‍ය වෙනවා. ඒ වගේම මේ නියඟය නිසා වී වගාවට වැඩි වශයෙන් බලපෑමක් නොවුණත් කෑගල්ල දිස්ත්‍රික්කයේ බුලත්කොහුපිටිය ආශ්‍රිත ප්‍රදේශයේ තේ වගාවට යම් හානිද‌ායක තත්ත්වයක් හෙවත් අස්වැන්නෙ අඩුවීමක් වාර්තා වී තිබෙනවා. එය නියං කාලය තුළ අත්විඳින තත්ත්වයක්. ඉදිරි මාසය ගත්තම මාර්තු කියන්නෙ සංවහන වර්ෂාව ලැබෙන කාලයක්. සිංහල අලුත් අවුරුදු කාලය වෙද්දි යම්කිසි වර්ෂාපතනයක් ඇතිවෙයි කියල හිතෙනවා. ඉතින් ඒ වනතුරු ජල මූලාශ්‍ර ආරක්ෂා කරගැනීම, ජලය මෙන්ම විදුලිය අරපිරිමැස්මෙන් පාවිච්චි කිරීම ආදිය ජනතාව පැත්තෙන් කළ යුතු දෙයක්.

 විදුලිබල මණ්ඩලයටත් නියඟය නිසා ප්‍රශ්න ඇතිවෙලා තියෙනවා විදුලිය නිෂ්පාදනය කිරීමට. ඒ නිසා විදුලිය සහ ජලය අරපිරිමැස්මෙන් භාවිත කළහොත් ජාතික ආර්ථිකයට ඉතාමත් වැදගත් සාධකයක් වෙයි.
මේ අතර මෙරට දිස්ත්‍රික් ද‌ාහතරක මිනිස් ශරීරයට දැනෙන උණුසුම් තත්ත්වය ඉහළ ගොස් තිබෙන නිසා ජනතාව ඒ පිළිබඳව ද අවධානය යොමු කළ යුතු බව කාලගුණ විද්‍යා දෙපාර්තමේන්තුව සඳහන් කරයි.
මේ අනුව මන්නාරම, පුත්තලම, කුරුණෑගල, ගම්පහ. කොළඹ, කළුතර, ගාල්ල, මාතර දිස්ත්‍රික්කවල ජනතාව දැඩි පීඩනයක සිටින බව වාර්තා වෙනවා. මුලතිව්, වව්නියා, අනුරාධපුර, කෑගල්ල, රත්නපුර, හම්බන්තොට දිස්ත්‍රික්කවල ජනතාව ද ශරීරයට දැනෙන උණුසුම් තත්ත්වය වැඩිවීම පිළිබඳ අවධානය යොමුකළ යුතු බව ද කාලගුණ විද්‍යා දෙපාර්තමේන්තුව සඳහන් කරයි. මේ නිසා වැඩබිම තුළ සිටින පිරිස් ප්‍රමාණවත් ලෙස ජලය පානය කරන ලෙසත්, සෙවණ ඇති ස්ථානවල හැකි පමණ විවේක ගන්නා ලෙසත් මීට අමතරව නිවෙස් තුළ සිටින වැඩිහිටි සහ රෝගී පුද්ගලයින් පිළිබඳ සැලකිලිමත් වන ලෙස ද කාලගුණ විද්‍යා දෙපාර්තමේන්තුවේ ස්වභාවික විපත් පිළිබඳ පූර්ව අනතුරු ඇඟවීමේ මධ්‍යස්ථානය පෙන්වා දෙයි. කුඩා දරුවන් වාහන තුළ තනිව රඳවා නොයන ලෙසත්, එළිමහනේ අධික වෙහෙසකාරී කටයුතු සීමා කරන ලෙසත්, සුදු හෝ ළා පැහැති සැහැල්ලු ඇඳුම් භාවිත කරන ලෙසත් එම මධ්‍යස්ථානය තවදුරටත් ඉල්ලා සිටියි.

පවතින තත්ත්වය හේතුවෙන් විජලනය, ලවණ ඉවත්වීම නිසා ඇතිවන මස්පිඬු පෙරළීම (Heat Cramps) සහ අධික උෂ්ණත්වය නිසා ඇතිවන අධික මහන්සිය (Heat Exhaustion) ඇතිවීමේ වැඩි හැකියාවක් ඇත.
ක්‍රියාකාරකම්වල නියතවීම තුළින් ශරීරයේ උෂ්ණත්ව නියාමන ක්‍රියාවලිය අඩපණ වීම නිසා ඇතිවන ආඝාත තත්ත්වය (Heat Stroke) ඇතිවීමේ හැකියාව වඩා ඉහළ ය.

ජමෙයිතුල් උලමා සංවිධානය නීතිමය රාමුවක් යටතේ ලියාපදිංචි නොකළ සංවිධානයක් බව හිටපු අධිකරණ අමාත්‍ය පාර්ලිමේන්තු මන්ත්‍රී විජයදාස රාජපක්ෂ මහතා පාස්කු ඉරු දින බෝම්බ ප්‍රහාරය සම්බන්ධයෙන් විමර්ශනය කරන ජනාධිපති කොමිෂන් සභාව ඉදිරියේ සාක්ෂි ලබා දෙමින් අද (28) ප්‍රකාශ කළේය.
1927 වර්ෂයේ සිට ශ්‍රී ලංකාව තුළ තුළ ක්‍රියාත්මක වන මෙම සංවිධානය මුස්ලිම් ජනතාවගේ ආගමික කටයුතු පිළිබඳව උපදෙස් ලබාදෙන උසස්තම මණ්ඩලය ලෙස සැලකෙන බව ද විජයදාස රාජපක්ෂ මහතා ජනාධිපති කොමිෂන් සභා වෙත දැනුම් දුන්නේය.
එම සංවිධානය හරහා මුස්ලිම් අන්තවාදය ක්‍රියාත්මක වන්නේ ද යන්න සොයා බලා අවශ්‍ය පියවර ගැනීම ආරක්ෂක අංශවල වගකීම බවද විජයදාස රාජපක්ෂ මහතා පැවසීය.
මෙම ජනාධිපති කොමිසම අභියාචනාධිකරණ විනිසුරු ජනක් ද සිල්වා  මහතාගේ ප්‍රධානත්වයෙන් බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ දී අද (28) රැස්විය

අටවන පාර්ලිමේන්තුව අනිද්දා (2) ජනාධිපති ගෝඨාභය රාජපක්ෂ මහතා විසින් විසුරුවා හැරීමට නියමිතයි.
ඒ සඳහා වන අතිවිශේෂ ගැසට් නිවේදනය අනිද්දා නිකුත් කිරීමට නියමිතව ඇතැයි ජනාධිපති ලේකම් කාර්යාල ආරංචි මාර්ග සඳහන් කළා.පාර්ලිමේන්තු මහ මැතිවරණය සඳහා ඡන්ද විමසීම අප්‍රේල් මස 25 වැනිදා පෙරවරු 7.00 සිට පස්වරු 4.00 දක්වා පැවැත්වීමට නියමිතයි. අදාළ ගැසට් නිවේදනය ප්‍රකාශයට පත්කිරීමෙන් පසු අගමැති මහින්ද රාජපක්ෂගේ ප්‍රධානත්වයෙන් භාරකාර ආණ්ඩුව ක්‍රියාත්මක වනු ඇති. භාරකාර ආණ්ඩුව යටතේ බලතල පැවරී ඇත්තේ කැබිනට් ඇමැතිවරුන්ට පමණක් වන අතර පාර්ලිමේන්තුව විසුරුවා හැරීමත් සමඟ රාජ්‍ය ඇමැතිවරුන්ගේ තනතුරු අහෝසි වනවා. පාර්ලිමේන්තුව ජනාධිපතිවරයා විසින් මාර්තු 2 වැනිදා විසුරුවා හැරෙන බැවින් පසු සියලුම තේරීම්භාර නිලධාරීන් සහ දිස්ත්‍රික් සහකාර මැතිවරණ කොමසාරිස්වරු ලබන 5 වැනිදා කොළඹට කැඳවීමට තීරණය කර ඇති බව මැතිවරණ කොමසාරිස් ජනරාල් සමන් ශ්‍රී රත්නායක මහතා සඳහන් කළා.

මැතිවරණය පැවැත්වීමේදී, ඒ ඒ දිස්ත්‍රික්කවල රාජකාරි කටයුතු සිදුකිරීමේදී මුහුණපාන ගැටලු හා ඡන්ද මධ්‍යස්ථාන හා ගණන් කිරීමේ මධ්‍යස්ථාන වැඩිකළ යුතු දිස්ත්‍රික්කයන්හි එම කටයුතු සිදුකෙරෙන ආකාරය, නිලධාරීන් මැතිවරණ රාජකාරි සඳහා යෙදවීමේදී මුහුණපාන ගැටලු සහ පසුගිය ජනාධිපතිවරණයේදී මුහුණ පෑ ගැටලු ආදිය සම්බන්ධයෙන් මෙහිදී සාකච්ඡා කිරීමට නියමිතව තිනෙනවා. මෙවර පාර්ලිමේන්තු මැතිවරණයේදී අපේක්ෂකයන් විශාල සංඛ්‍යාවක් ඉදිරිපත් වුවහොත්, මනාප ඡන්ද ගණන් කිරීමේදී වැඩි කාලයක් ගත කිරීමට නියමිත බැවින්, එම කාලය අවම කරගැනීම කෙරෙහිද මැතිවරණ කොමිෂන් සභාවේ අවධානය යොමු වී තිබෙනවා.පාර්ලිමේන්තු මැතිවරණය සඳහා තරග කරන අපේක්ෂකයන්ට, නාමයෝජනා භාරගනු ලබන දිනයේ අවසාන මොහොත දක්වාම ඇප මුදල් තැන්පත් කළ හැකි යැයි මැතිවරණ කොමිෂන් සභාවේ සභාපති මහින්ද දේශප්‍රිය සඳහන් කළා

එම්.සී.සී ගිවිසුම අත්සන් කිරීම අත්හිටුවයි
සහස්‍ර අභියෝගතා සංස්ථාව හෙවත් මිලේනියම් චැලේන්ජ් කෝපරේෂන් ගිවිසුම අත්සන් කිරීම අත්හිටුවීමට අමාත්‍ය මණ්ඩලය තීරණය කළ බව කැබිනට් ප්‍රකාශක අමාත්‍ය බන්දුල ගුණවර්ධන මහතා පැවසීය. එම ගිවිසුම සමාලෝචනය කිරීමට පත්කළ කමිටුවේ අතුරු වාර්තාව මහින් ඉදිරිපත් කළ කරුණු හා නිර්දේශ සළකා බලා මෙම තීරණය ගත් බව ඇමතිවරයා කීවේය. අමාත්‍යවරයා මේ බව පැවසුවේ රජයේ ප්‍රවෘත්ති දෙපාර්තමේන්තුවේ දී අද (28) පැවති කැබිනට් තීරණ දැනුම්දීමේ අවස්ථාවකදීය.

කොරෝනා බවට සැකපිට ඉතාලියේ සිට පැමිණි ලාංකිකයින් දෙදෙනෙක් IDH රෝහලට
නව කොරෝනා වෛරසය ආසාධිතවූ බවට සැක කෙරෙන ලාංකිකයින් දෙදෙනක් අංගොඩ පිහිටි IDH රෝහලට ඇතුලත් කර තිබෙනවා. IDH රෝහලේ අධ්‍යක්ෂක වෛද්‍ය හසිත අත්තනායක සඳහන් කලේ මෙම පුද්ගලයින් දෙදෙනා ඉතාලියේ සිට ශ්‍රී ලංකාවට පැමිණ ඇති බවයි. මේ වන විට එම පුද්ගලයින් දෙදෙනාගේ සාම්පල් බොරැල්ල වෛද්‍ය පරීක්ෂණ ආයතනයට යවා ඇති බවයි IDH රෝහලේ අධ්‍යක්ෂක වෛද්‍ය හසිත අත්තනායක සඳහන් කලේ. මෙම පුද්ගලයින් දෙදෙනාට උණ සහ කැස්ස රෝග ලක්ෂණ පෙන්නුම් කරන බවයි රෝහල් ආරංචි මාර්ග සඳහන් කර සිටින්නේ.

කිසිම කෙනෙකුට මහජන මුදල් යොදවා සැප දෙන්න යන්න එපා; ඇමැතිලාගේ ‘හෙලිකොප්ටර් ගායට’ ජනපති හරස් වෙයි..ආණ්ඩුවේ ප්‍රබල දේශපාලඥයන් කිහිප දෙනෙකු විසින්ම දුර බැහැර කටයුතුවලට සහභාගි වීම සඳහා ගුවනින් ගමන් ගැැනීමට අවශ්‍ය කරන හෙලිකොප්ටර් ලබා දෙන ලෙස කළ ඉල්ලීම් ප්‍රතික්ෂේප වී ඇතැයි වාර්තා වේ. සියලු ඇමැතිවරුන්ට ඉන්ධන සහිත වාහන ලබාදී තිබියදී තවදුරටත් මෙවන් ඉල්ලීම් සිදුකිරීම ජනාධිපතිවරයාගේ නොසතුටට හේතු වී ඇතැයිද වාර්තා වේ. ආණ්ඩුව මුල්‍ය අර්බුදයකට මුහුණ පා සිටියදී මෙවන් අනවශ්‍ය වියදම් සිදුකිරීම කිසිසේත්ම නොකළ යුතු බව ජනාධිපතිවරයා විසින් නිලධාරීන් දැනුවත් කර ඇතැයි ජනාධිපති කාර්යාල ආරංචිමාර්ග සඳහන් කරයි.

යමෙක්ට දුර බැහැර දේශපාලන කටයුතුවලට සම්බන්ධ වීමට අවශ්‍ය නම් ඒ සඳහා සිය නිලරථ භාවිතා කරන ලෙස ද අදාළ ඇමැතිවරුන්ට ජනාධිපතිවරයා විසින් පෞද්ගලිකවම දැනුම් දී ඇතැයිද අභ්‍යන්තර ආරංචිමාර්ග සඳහන් කරයි. දේශපාලකයකු කියූ පමණින් ඔහුට අවශ්‍ය වියදම් සැපයීම අදාළ නිලධාරීන් විසින් නොකළයුතු බවද ජනාධිපතිවරයා ආයතන ප්‍රධානීන්ට දන්වා ඇතැයිද සඳහන්. මහජන මුදල් අනවශ්‍ය ලෙස වියදම් නොකොට රටේ සංවර්ධනය සඳහා ඒවා උපරිමාකාරයෙන් යෙදවීම සියලු දෙනාගේ වගකීම බවද ජනාධිපතිවරයා විසින් වැඩිදුරටත් අවධාරණය කර ඇති බව ආරංචිමාර්ග සඳහන් කරයි

නවගත්තේගම මහමැද්දෑව ප්‍රදේශයේ මාස හයක කුඩා දරුවකු නිවසේ මේසයක් මතින් පහළට වැටීමෙන් බරපතළ ලෙස තුවාල ලබා පෙරේදා (26) සවස නවගත්තේගම රෝහලට ඇතුළත් කිරීමෙන් පසු
මරණයට පත්වී ඇතැයි නවගත්තේගම පොලිසිය කියයි. මෙසේ මරණයට පත්වී ඇත්තේ මාස හයක්  වයසැති දනුජ දහම්ස නමැති දරුවෙකි. ඔහු සිව්  දෙනෙකුගෙන් යුත් පවුලේ බාල දරුවා බව පොලිසිය කියයි. සිද්ධිය වන අවස්ථාවේ දරුවගේ මව නිවසේ  සිට නැති බවත් ඒ වන විට දරුවන්ගේ මිත්තනිය භාරයේ දරුවන් රැදී සිට ඇති බවත් පොලිස් පරික්ෂණ වලදී සනාථ වී තිබේ. මරණයට පත් දරුවාගේ පියා කටුනායක ප්‍රදේශයේ රැකියාවක නිරතව සිටින බවද කියයි.

කුඩා දරුවන් හා මවත් මිත්තනියත් කුඩා කටු මැටි ගැසු නිවසක දිවි ගෙවන අතර දරුවන්ගේ මව පාපිසි සැකසීමට යොදා ගන්නා මේසය මත දරුවන් සිව් දෙනාම රැඳී සිට ඇති බව කියති. අනෙක් දරුවන් මේසය මත වූ දරුවා සුරතල් කරමින් සිටියදී මෙම අනතුර සිදුව ඇති බව පොලිසිය පවසයි. සිද්ධිය සම්බන්ධව කරඹෑපත්තුව හදිසි මරණ පරික්ෂක ඊ.එම්. තිලකරත්න මහතා මරණ පරික්ෂණය පැවැත් වූ අතර මරණය සම්බන්ධව පශ්චාත් මරණ පරික්ෂණය සඳහා දරුවාගේ දේහය පුත්තලම මූලික  රෝහලේ අධිකරණ මෙවද්‍ය නිලධාරිවරයා වෙත යොමු කිරීමට කටයුතු කර තිබුණි. නවගත්තේගම පොලිසිය සිද්ධිය සම්බන්ධව වැඩිදුර විමර්ශන අරඹා තිබේ.

නගර යා කරමින් අධිවේගී මාර්ග ඉදිවෙද්දී ප්‍රවාහනයේ තවත් නව ව්‍යාපෘතියක් ලබන 11 වනදා ආරම්භ කෙරෙනවා. ඒ බත්තරමුල්ල හා වැල්ලවත්ත යා කරමින් නව බෝට්ටු සේවාවක් ආරම්භ කිරීමයි. රථ වාහන තදබදයට ප්‍රායෝගික විසඳුමක් ලබා දෙමිනුයි මෙය ආරම්භ කෙරෙන්නේ.
බත්තරමුල්ල දියත උද්‍යානයේ සිට වැල්ලවත්ත දක්වායි මෙම මගී ප්‍රවාහන බෝට්ටු සේවාව ක්‍රියාත්මක වන්නේ. එහි නැවතුම් ලෙස දියතඋයන, නාවල විවෘත විශ්වවිද්‍යාලය හා වැල්ලවත්ත නම් කර තිබෙනවා. මහා මාර්ගය ඔස්සේ බත්තරමුල්ල සිට වැල්ලවත්ත දක්වා කාර්ය බහුල වේලාවකදී ගමන් කරන්නෙකුට පැය එකහමාරකට අධික කාලයක් ගත වනවා. ස්වාභාවික පරිසර පද්ධතියේ අසිරිය ද විඳිමින් විනාඩි 20 ක් වැනි කෙටි කාලයක් තුළ බෝට්ටු සේවාව භාවිත කරන්නෙකුට ගමනාන්තයට ළඟාවිය හැකියි. ශ්‍රී ලංකා ඉඩම් සංවර්ධනය කිරීමේ සංස්ථාව හා නාවික හමුදාවේ සහයෝගය ඇතිවයි මෙම සේවාව ක්‍රියාත්මක වන්නේ.

හම්බන්තොට, සූරියවැව මහින්ද රාජපක්‍ෂ කී‍්‍රඩාංගණයේ ඊයේ පැවති කොදෙව් - ශී‍්‍ර ලංකා දෙවන එක්දින තරගය නැරඹීමට පැමිණි කී‍්‍රඩාලෝලීන්ට එම කී‍්‍රඩාංගණයේ පිවිසුම් දොරටුව අසලදී ආරක්‍ෂක අංශ විසින් සිදුකළ පහරදීම සම්බන්ධයෙන් තමන් එම කී‍්‍රඩා ලෝලීන්ගෙන් සමාව අයැද සිටින බව කී‍්‍රඩා අමාත්‍ය ඩලස් අලහප්පෙරුම පවසනවා. අදහස් දක්වමින් කී‍්‍රඩා අමාත්‍යවරයා සදහන් කළේ මේ සම්බන්ධයෙන් තමන් ශී‍්‍ර ලංකා කි‍්‍රකට් ආයතනයේ නිලධාරීන්ගෙන්ද කරුණු විමසීමක් සිදුකරන බවයි. වසර 5 කට පසු හම්බන්තොට පැවති මෙම දිවා රාතී‍්‍ර එක්දින කි‍්‍රකට් තරගය නැරඹීමට පැමිණි කි‍්‍රකට් ලෝලීන්ට මෙලෙස පහරදීම තමන් හෙළා දකින බවද කී‍්‍රඩා අමාත්‍යවරයා සදහන් කළා.

''නාම යෝජනා නොදෙන්න රන්ජන් කිසිම වැරැද්දක් කරලා නැහැ'' - හිරුණිකා රන්ජන්ගෙන් සහයට එයි
සජිත් ප්‍රේමදාස මහතාගේ නායකත්වයෙන් බිහිවන සමගි ජනබලවේගය සඳහා නාමයෝජනා නොදී සිටීමට තරම් පාර්ලිමේන්තු මන්ත්‍රී රන්ජන් රාමනායක මහතා වරදක් කර නැතැයි පාර්ලිමේන්තු මන්ත්‍රිනී හිරුණිකා ප්‍රේමචන්ද්‍ර මහත්මිය ඊයේ (26) කොළඹදී පැවසුවාය. කොළඹ, මාර්ක්ස් ප්‍රනාන්දු මාවතේ විපක්ෂනායක කාර්යාලයේ  පැවති මාධ්‍ය හමුවකට එක්වෙමින්  ප්‍රේමචන්ද්‍ර මහත්මිය මේ බව පැවසුවාය. පාර්ලිමේන්තු මන්ත්‍රී රන්ජන් රාමනායක මහතාට ඇප හිමිවීමත් සමඟ ඉදිරියේදී  ඒ මහතාගේ තවත් හඬපට පිටතට එනු ඇතැයිද ඇය කියා සිටියාය.
මන්ත්‍රීවරයාට නාමයෝජනා හිමිවනු ඇති බවද  ප්‍රේමචන්ද්‍ර මහත්මිය  පැවසුවාය